काठमाडौं । गृहमन्त्री रमेश लेखकले चैत १५ गते काठमाडौंको तीनकुनेमा भएको हिंसात्मक घटनाको सरकारले निष्पक्ष छानबिन गर्ने बताउनुभएको छ । उहाँले दोषीमाथि फौजदारी कसुरअनुसार नै कारबाही अगाडि बढ्ने जानकारी दिनु भयो ।
प्रतिनिधिसभा अन्तर्गत कानुन समितिको आज बसेको बैठकमा उपस्थित हुनु भएका गृहमन्त्री लेखकले हिंसात्मक घटनाको छानबिन सरकारले गरिरहेको जानकारी गराउनु भएको हो ।
उहाँले घटनामा संलग्न सबैमाथि कारबाही हुने पनि बताउनुभयो । मन्त्री लेखकले राजावादी आन्दोलनका कमान्डर दुर्गा प्रसाईंलाई पक्राउ गरिसकिएको समेत समितिलाई जानकारी दिनुभयो । प्रहरीले प्रसाईंलाई आजै पक्राउ गरी झापाबाट काठमाडौं ल्याइसकेको छ ।
बैठकमा सांसदहरुले तीनकुनेमा भएको हिंसात्मक घटनामा जिम्मेवार देखिएको भन्दै पूर्वराजा ज्ञानेन्द्र शाहलाई पनि कारबाहीको दायरामा ल्याउन माग गरेका छन् ।
नेपाली कांग्रेसका सांसद जीवन परियारले पूर्वराजालाई समितिमै बोलाएर सोधपुछ गरिनुपर्ने माग गर्नुभयो । अन्य नागरिकलाई जति अधिकार छ शाहलाई पनि त्यति मात्रै अधिकार भएको भन्दै सांसद परियारले समितिमा बोलाएर सोधपुछ गर्नुपर्ने माग गर्नुभएको हो । घटनामा संलग्न भनिएकाहरुसँग प्रहरीले बोलाएर सोधपुछ गरिरहेकाले पूर्वराजालाई चाहिँ किन नगर्ने भन्दै उहाँले प्रश्न गर्नुभयो ।
