काठमाडौं । अर्थमन्त्री डा. रामशरण महतले बजेट निर्माणमा इमानदारिताका साथ काम गरेको दाबी गरेका छन् ।
आर्थिक वर्ष २०८०/८१ को आर्थिक विधेयक तर्जुमाका क्रममा अनधिकृत व्यक्ति संलग्न रहेकाबारे प्रमुख प्रतिपक्षी एमालेलगायतका दलले जवाफ मागेपछि अर्थमन्त्री महतले कुनै चलखेल नभएको दाबी गरेका हुन् ।
उनले निजी स्वार्थ भएकाहरुले चलखेल गर्न नपाएकै कारण आफ्नो पछि लागेको आरोप पनि लगाए । प्रतिनिधिसभाको आजको बैठकमा जवाफ दिँदै उनले भने, ‘इमान्दारितामा एक इन्च, एक रौँ पनि कहीँकतै हल्लिएको छैन । त्यही भएर निजी स्वार्थ भएकाहरु चाहिँ पछि लागेका छन् । कुरो यही हो । यो भन्दा अर्को कुरै छैन ।’
मन्त्री महतले करका दर हेरफेरमा बिचौलियाको भूमिका रहेको भन्ने आरोपको खण्डन गर्दै आफूले बिचौलियालाई छेउछाउमा समेत पर्न नदिएको जिकिर गरे ।
‘बजेट निर्माणमा चलखेल भयो कि भन्ने कुरा आएको छ । बिचौलियाको कुराहरु आएको छ, उनले भने, ‘बिचौलियालाई त मैले छेउछाउमै पनि आउन दिएको छैन।’
अर्थमन्त्री महतले इमान्दार भएर काम गर्न कठिन भएको उल्लेख गर्दै इमान्दार हुँदा प्रश्नमाथि प्रश्न उठ्ने गरेको गुनासो गरे । ‘इमान्दार भएर काम गर्न कति कठिन हुँदो रहेछ । इमान्दार हुँदा खेरी प्रश्नमाथि प्रश्न उठ्दो रहेछ,’ उनले भने, ‘एउटा पत्रिकाले एउटा समाचार पटक–पटक दोहो¥याउँछ । त्यसैलाई हामी सत्य ठान्दछौँ । वास्तविकता के हो भने पारदर्शी ढंगबाट, कुनै पनि प्रभावबाट मुक्त भएर मैले काम गरेको छु ।’
‘हामी सबै असत्य ? हामी चाहिँ झुटा, नराम्रो काम गर्न बस्या ? यो त हुन सक्दैन ? कसैले लेखिदियो उचाहिँ सत्य भयो ?’ उनले प्रश्न गरे ।
बजेट निर्माणमा अनधिकृत व्यक्तिका रुपमा संलग्न रहेको भनिएका पूर्व नायब सुब्बा (नासु) रामकृष्ण श्रेष्ठले तथांक इन्ट्री गर्ने कार्यमा सहयोगीका रुपमा मात्रै काम गरेको अर्थमन्त्री महतले स्पष्ट पारे ।
‘दुई महिनाको समयमा अर्को मान्छे तयार गर्ने समय नभएकाले दक्ष, अनुभवी र इमान्दारिताका कारण उनलाई काममा लगाइएको हो,’ मन्त्री महतले भने, ‘उनले सिस्टमअनुसार काम गरेका छन् । उनलाई यो काम गर भनेर दिएको निर्देशनभन्दा अरु काम नगरेको संसदलाई विश्वास दिलाउन चाहन्छु ।’