काठमाडौं । प्रतिनिधिसभाको बैठक सुरु भएको छ । बिहान ११ बजेका लागि बोलाइएको बैठक बस्न नसकेपछि दिउँसो साढे १ बजेका लागि सारिएको थियो । बैठकमा बजेटका विषयमा छलफल चलिरहेको छ ।
बैठकमा प्रमुख प्रतिपक्षी नेकपा एमाले, रास्वपा, राप्रपालगायत दलहरुले बजेट निर्माणका क्रममा अनधिकृत व्यक्तिलाई प्रवेश गराइएको भन्दै सदनमा प्रश्न उठाइएको छ ।
सरकारले यही जेठ १५ गते संसद्मा प्रस्तुत गरेको आर्थिक वर्ष ०८०/८१ को राजस्व र व्ययको वार्षिक अनुमान (बजेट) माथिको छलफल आज पनि जारी रहेको छ । बजेटमाथिको छलफल हिजो (सोमबार) देखि सुरु भएको हो ।
उता राष्ट्रियसभाको बैठक भने सूचना टाँस गरी स्थगित गरिएको छ । आजका लागि तोकिएको बैठक विशेष कारणवश बस्न नसक्ने भएको उल्लेख गर्दै संसद् सचिवालयका महासचिव भरतराज गौतमले बुधबार बिहान ११ बजेर ११ मिनेटका लागि निर्धारण गरिएको जनाएका छन् ।