जनकपुर । मधेश प्रदेशको राजधानी जनकपुरधामको पिडारी चोकस्थित गोरधोई पोखरी छेउमा ठूलो परिमाणमा प्रतिबन्धित औषधिको बोतलहरू प्रयोग गरी फालिएको अवस्था फेला परेको छ ।
युवा अभियानकर्मीहरूको एक समुहले ऐतिहासिक धार्मिक र सांस्कृतिक महत्वका गोरधोई पोखरी सफा गर्ने क्रममा रेल्वे लिकको छेउमा ६ वटा प्लास्टिकका बोराभित्र पोका पारी फालिएको अवस्थामा प्रतिबन्धित औषधिको खाली बोतलहरू फेला पारेका हुन ।
बोराभित्र विभिन्न किसिमका प्रतिबन्धित लागू औषध प्रयोग गरिएका बोतल, ट्याबलेटका पत्तालगायतका रहेको सरसफाइ अभियानी पुष्पराज कुँवरले जानकारी दिनुभयो । सो वस्तु फेला परेलगत्तै जनकपुरका सचेत युवाहरूले प्रहरीलाई खबर गरेको थियो ।
यस विषयमा थप अनुसन्धान भइरहेको धनुषाका प्रहरी उपरीक्षक रूगम बहादुर कुँवरले जानकारी दिनुभयो । खुला सिमानाको फाइदा उठाउँदै अवैध कारोबारीहरूले चोरबाटो प्रयोग गरी भारतका विभिन्न स्थान भएर लागू औषध नेपालतर्फ भित्र्याउने गरेको छ ।
जनकपुरलगायतका क्षेत्रमा आपराधिक घटनाहरू बढ्नुको मुख्य कारक मध्ये लागू औषधको बिक्रीवितरण र सेवन पनि रहेको सरोकारवालाहरूले बताउँदै आएका छन । पछिल्लो समय ठूलो परिमाणमा प्रतिबन्धित औषधिको बोतलहरू प्रयोग गरी फालिएको अवस्था फेला परेको घटनाले संगठित रूपमा यसको कारोबार हुँदै आएको आशंकामाथि थप बल पुगेको छ ।
समाज, स्थानीय तह र सुरक्षाकर्मी सबैको संयुक्त प्रयास बिना रोकथाम सम्भव नरहेको जनकपुरका युवा अभिषेक यादवले सामाजिक सञ्जालमा लेख्नुभएको छ ।
