धनकुटा । पहिरो खसेपछि निर्माणाधिन भेडेटार रबीराँके सडक अवरुद्ध भएको छ ।
भेडेटार र डाँडाँबजारबीचको पहिरे तथा समेवा छनम्वर बुधबारेबीचको सौरे भन्ने ठाउँमा ढुङ्गा सहितको पहिरो खसेपछि शुक्रबार बिहान १० बजेबाट यातायातका साधनहरु ठप्प भएका छन् ।
सडक अवरुद्ध भएपछि यो मार्ग भएर धनकुटा र पाँचथर आवतजावत गर्ने यातायात, ढुवानीका साधन भेडेटार र छनम्बर बुधबारेमा रोकिएका छन् ।
अवरोध हटाउँन सडक निर्माणको ठेक्का पाएको भारतको एप्को इन्फ्राटेक कम्पनीका प्रतिनिधि स्काभेटर र आवश्यक जनशक्ति सहित पहिरो खसेको स्थानमा पुगिसको छ । तर वर्षा जारि रहेकाले काम सुरु गर्न नसकेको धनकुटाका प्रहरी उपरिक्षक श्यामसिंह चौधरीले जानकारी दिनुभयो ।
वर्षात कम हुने बित्तिकै पहिरो पन्छाएर सडक सुचारु गर्न समन्वय गरिरहेको धनकुटाका प्रमुख जिल्ला अधिकारी पूण्यबिक्रम पौडेलको भनाई छ ।
