मधेसका मुख्यमन्त्री यादवद्वारा पदभार ग्रहण : सुशासन पहिलो प्राथमिकता

काठमाडौं । मधेश प्रदेशका मुख्यमन्त्री कृष्णप्रसाद यादवले पदभार ग्रहण गर्नुभएको छ ।

आइतबार नै पद तथा गोपनीयताको सपथ ग्रहण गर्नुभएका मुख्यमन्त्री यादवले मुख्यमन्त्री कार्यालय पुगेर पदभार ग्रहण गर्नुभएको हो । पदभार ग्रहण गर्नुहुँदै मुख्यमन्त्री यादवले चाँडै नै मन्त्रीमण्डल विस्तार गर्ने जानकारी दिनुभयो । उहाँले पहिलो दिनदेखि नै काम गर्ने उद्देश्यका साथ सरकारमा आएको बताउनु हुँदै सत्ता घटकका सबै दलबाट प्रतिनिधित्व हुनेगरी चाँडै नै मन्त्रीमण्डल विस्तार गर्ने बताउनु भयो । 

मुख्यमन्त्री यादवले प्रतिपक्षी दलहरूबाट समेत रचनात्मक सहयोग प्राप्त गर्ने अपेक्षा गर्नुभएको छ । उहाँले सुशासन कायम गर्ने र प्रदेशबाट गर्नसक्ने कार्यहरू छिटो, छरितो गर्ने काममा आफू लाग्ने बताउनु भयो । उहाँले मधेस प्रदेशमा अब स्थायित्व कायम हुने बताउनु भयो ।