सिरहा । सिरहामा गैरदलित युवतीसँग प्रेम विवाह गरेका युवकलाई प्रहरीले रातभर थुनामा राखेको पाइएको छ ।
सुखीपुर नगरपालिका-५ का २१ वर्षीय अमृत कुमार मोचीलाई प्रहरीले गैरकानुनी ढंगले थुनामा राखेको पाइएको हो । अमृतलाई शुक्रबार राति ११ बजे नै सिरहा र धनुषाको सीमामा पर्ने कमला नदीको पुल छेउबाट प्रहरीले नियन्त्रणमा लिएको थियो । इलाका प्रहरी कार्यालय, बन्दिपुरले गाडीमा राखेर सिधैं अमृतलाई इलाका प्रहरी कार्यालय, गोलबजार पुर्याएको थियो ।
गोलबजारमा रातभर हिरासतमा राखिएका उनलाई स्थानीय अगुवाहरूको चासोपछि शनिबार साँझ मात्रै आफन्तको जिम्मामा छाडिएको छ । अमृतसँगै उनकी पत्नी धनगढीमाई नगरपालिका-२ की २० वर्षीया कोसिका कुमारी साहलाई पनि प्रहरीले नियन्त्रणमा लिएको थियो ।
रातभर गोलबजारस्थित सेफ हाउसमा राखिएकी उनलाई पनि अमृतकै परिवारलाई जिम्मा लगाइएको छ । विगत एक वर्षदेखि प्रेममा रहेका उनीहरूलाई शुक्रबार विवाहका गराउनका लागि अमृतका आफन्त र गाउँलेले जनकपुरस्थित जानकी मन्दिर लगेका थिए । तर, त्यहाँ विवाह भइरहेकै बेला युवतीका बुबा फुलगेन साहसहित १५-२० जनाको समूह पुगेर विवाद गर्न खोजेपछि प्रहरीले युवक र युवतीलाई नियन्त्रणमा थियो ।
उनीहरूलाई जिल्ला प्रहरी कार्यालय, धनुषामा लगिएको थियो । धनुषा प्रहरीमा युवक र युवती दुवैले उमेर पुग्ने कागजात देखाउँदै आफूहरू राजीखुसी विवाह गर्न चाहेको बताएपछि प्रहरीले दुवैलाई युवकको परिवारलाई जिम्मा लगाइदिएको थियो । उनीहरूले आफूहरू असुरक्षित रहेको बताएपछि धनुषा प्रहरीले गाडीमै कमला पुलसम्म पुर्याइदिएको थियो ।
तर, सिरहा प्रहरीले भने आफूहरूलाई पुलमै छाड्दै छोरा र बुहारीलाई जबर्जस्ती अपहरण शैलीमा नियन्त्रणमा लिएको अमृतकी आमा रूकमिनी मोचीले बताइन् । प्रहरी प्रभावमा परेर आफ्नो छोरा-बुहारीलाई छुटाउने नियतले यस्तो व्यवहार गरेको उनको आरोप छ ।
'हामीले नागरिकता देखाएपछि धनुषा प्रहरीले छाडिदिएको थियो, हामीलाई सुरक्षित ढंगले घर पुर्याइदिनुको साटो सिरहा आइपुगेपछि यहाँका प्रहरीले मेरो छोरालाई थुनेर राखे,' रूकमिनीले कान्तिपुरसित भनिन्, 'प्रहरी प्रभावमा परेर मेरो छोरा-बुहारीलाई छुटाउन खोजेको देखिन्थ्यो, सायद हामी दलित भएर यस्तो व्यवहार भयो ।'
तर, सिरहा प्रहरीले भने शान्ति सुरक्षाका लागि युवक र युवतीलाई नियन्त्रणमा राखिएको दाबी गरेको छ । 'उनीहरूलाई छाड्दा दुई पक्षबीच विवाद हुन सक्थ्यो, त्यसैले नियन्त्रणमा राखेका हौं,' जिल्ला प्रहरी कार्यालय, सिरहाका प्रवक्ता डीएसपी रमेशबहादुर पालले भन्नुभयाे, 'यसमा अरू त्यस्तो केही छैन ।'
मधेश पुस्तकालयका संरक्षक आभाष गुरूले प्रहरीले कसैलाई पनि विनाकारण अपराधि जसरी थुनामा राख्नुलाई गैरकानुनी कार्य हुने बताउनुभयाे । प्रहरीले नागरिकलाई असुरक्षा भए घरमै सुरक्षाको प्रत्याभूत गर्नेगरी व्यवस्था मिलाउनुपर्नेमा थुनेर राख्नु निन्दनीय रहेको उहाँको भनाइ छ ।
'राज्यको संयन्त्रमा उच्चजातीय अहंकार बोकेका व्यक्तिहरूको हालीमुहाली छ, त्यसकारण दलितमाथि पटकपटक दमन हुन्छ, यो घटना त्यसैको पुनरावृत्ति हो,' उहाँले भन्नुभयाेर, 'प्रहरीले घरमै सुरक्षा बन्दोबस्त गर्नुको साटो सुरक्षाका लागि थुनेर राखेको भन्नू निकै लज्जास्पद हो, प्रहरीले घोर गैरकानुनी कार्य गर्यो ।'
युवक र युवती दुवैलाई युवकको परिवारको जिम्मा लगाइए पनि उनीहरू अझै गोलबजार प्रहरी कार्यालयबाट निस्कन सकेका छैनन् । युवकका गाउँले छिमेकी रामउदगारका अनुसार, युवतीका बुबासहित एउटा समूह प्रहरी कार्यालयको गेटमै रहेको र यहाँबाट निस्के विवाह हुनसक्ने बताए । तर, घरसम्म पुर्याइदिनका लागि प्रहरीलाई पटक-पटक आग्रह गर्दा पनि नसुनेको र आफैं जान भनिरहेको उहाँले जानकारी दिनुभयाे ।
