धनकुटा । जेन-जी आन्दोलका क्रममा भदौ २४ गते सुनसरीको झुम्का कारागारबाट फरार पाँचजना कैदी धनकुटामा पक्राउ परेका छन् ।
धनकुटाबाट पक्राउ पर्नेमा अदातलबाट साढे दुईदेखि २५ वर्षसम्म कैद सजाय तोकिएका कर्तव्य ज्यान, अंगभंग र लागूऔषध मुद्दाका दोषी छन् । कर्तव्यज्यान मुद्दामा २५ वर्ष सजाय तोकिएका सुनसरीको धरान उपमहानगरपालिका-२० बस्ने ३२ वर्षीय सागर राईलाई धनकुटाको छथर जोरपाटी गाउँपालिका-२ आलेगाउँबाट पक्राउ गरिएको हो ।
यस्तै कर्तव्यज्यान, जबरजस्ती करणी र चोरी मुद्दामा २० वर्ष कैद र एकलाख रूपैयाँ जरिवाना तोकिएका धनकुटाको चौविसे-२ धारापानीका रमेश माङमी मगर छन् । उनलाई लुकेर बसेको अवस्थामा घरैबाट पक्राउ गरिएको धनकुटाका प्रहरी उपरिक्षक सरतकुमार थापा क्षेत्रीले जानकारी दिनुभयाे ।
कर्तव्य ज्यान मुद्दामा १२ वर्ष ६ महिना कैद सजाय तोकिएका संखुवासभाको खाँदबारी-९ का युवराज राई भेडेटारबाट पक्राउ परेका छन् । यस्तै अंग-भगं मुद्दामा दुई वर्ष ६ महिना कैद र २५ जरिवाना तोकिएका चौविसे-३ का सिजन तामाङलाई पक्राउ गरिएको प्रहरीले जनाएको छ ।
यस्तै लागूऔषध मुद्दामा पुर्पक्षका लागि थुनामा रहेका धनकुटा शहीदभूमि-२ का २१ वर्षीय गन्धरे भन्ने सुरेश शिवालाई घरबाटै पक्राउ गरिएकाे हाे । पक्राउ परेका पाँचै जनालाई कारागारमा बुझाइएको धनकुटाका प्रहरी उपरिक्षक शरतकुमार थापा क्षेत्रीको भनाइ छ ।
