बर्दिया । देशभरका सबै राष्ट्रिय निकुञ्जसहित आसपासका वनमा पुस पहिलो सातादेखि बाघ गणना गरिने भएको छ।
क्यामेरा ट्रापिङ प्रविधिबाट गणना गरिने बाघ गणनाका लागि यथेस्ट क्यामेरा भने नभएपनि गणनाको तयारी तिव्र पारिएको बर्दिया निकुञ्जले जनाएको छ । बर्दिया निकुञ्ज र आसपास गरी करिब ४ सय ५० क्यामेराको आवश्यकता रहेको राष्ट्रिय प्रकृति संरक्षण कोष, बर्दियाका प्रमुख अजित तुम्बाहाम्फेले बताउनुभयो।
राष्ट्रिय निकुञ्जसहित आसपासका वनमा बाघ गणना आउने पुस पहिलो साताबाट गर्ने तयारी भएपनि क्यामेराको व्यवस्था नहुँदा निकुञ्जका अधिकारी अन्यौलमा छन्। बाघको गणना चितवन-पर्सा, बाँके, बर्दिया र शुक्ला राष्ट्रिय निकुञ्ज र लालझारी कम्प्लेक्समा हुने राष्ट्रिय निकुञ्ज विभागले जनाएको छ।
निकुञ्जमा हरेक चार वर्षमा बाघको गणना हुने गर्छ। राष्ट्रिय निकुञ्ज तथा वन्यजन्तु विभाग, विश्व वन्यजन्तु संरक्षण कोष र राष्ट्रिय प्रकृति संरक्षण कोषबाट संयुक्त प्राविधिक टोलीले क्यामेरा ट्रापिङको सहयोगमा गणना गरिने छ। निकुञ्जबाहेक खाता जैविक मार्ग र आसपासका क्षेत्रमा पनि बाघको गणना हुनेछ।
बाघ गणनाका लागि खटिने प्राविधिक टोलीलाई मंसिर अन्तिम साताबाट प्रशिक्षण दिने तयारी छ। बाघ गणना २१ दिनसम्म हुने छ। सन् २०१३ मा गणना हुँदा बर्दिया निकुञ्जमा ५० वटा बाघ थिए। चार वर्षअघि बाघ गणना गर्दा बर्दियामा संख्या १ सय २५ पुगेको थियो।
