धनकुटा । नेकपा एमालेको ११औँ राष्ट्रिय महाधिवेशनका लागि प्रतिनिधि छनाेट प्रक्रियाका क्रममा धनकुटामा विवाद उत्पन्न भएको छ।
सहमतिमै प्रतिनिधि चयन गर्ने प्रतिबद्धता गरेको केन्द्रीय सदस्य राजेन्द्र राई पक्षले अफ्नो पक्षका व्यक्तिलाई उम्मेदवारी फिर्ता लिन लगाएर मतदानको प्रक्रिया सुरू गरेको भन्दै कोशी प्रदेश सचिवालय सदस्य इन्द्रमणी पराजुली समूहले असन्तुष्टि जनाएको हो ।
पराजुली समूहले शनिबार बिहान धनकुटामा पत्रकार सम्मेलन गर्दै चुनाव प्रक्रियालाई पूर्ण रूपमा अस्वीकार गर्ने जनाएको हो । एमाले कोशी प्रदेश कमिटीका सदस्य इन्द्रमणी पराजुलीले केन्द्रीय सदस्य राजेन्द्र राई पक्षले आफ्नो पक्षका अधिकांश उमेदवारलाई मनोनयन फिर्ता लिन दबाब दिएर पार्टी सदस्य मतदाताहरूलाई झुक्याएर मतदान प्रक्रियामा गएको आरोप लगाउनु भयो ।
पत्रकार सम्मेलनमा एमाले केन्द्रीय सदस्य सकुन्तला बस्नेत, नेता चन्द्र बस्नेत, निरेन तामाङ, मञ्जु अधिकारी, बलदीप राई, तारा तितुङलगायतको सहभागिता रहेको थियाे। यता राजेन्द्र राई पक्षले भने लामो सहमतिको प्रयासपछि पनि सहमति नजुटेपछि निर्वाचन कार्यतालिकाअनुसार मतदान प्रक्रिया अघि बढाइएको जनाएको छ ।
मतदान सुरू हुनुअघि इन्द्रमणी पराजुली समूहले एमाले जिल्ला पार्टी कार्यालय र धनकुटा-६ स्थित कचिडेमा निर्धारण गरिएको मतदान स्थलमा तोडफोड गरेको थियो ।
.png&w=400&height=300)
