काठमाडौं । निरन्तरको वर्षा र बाढीपहिरोले सडक प्रभावित बनेपछि आज राति काठमाडौं भित्रिने र बाहिरिने सवारी साधन सञ्चालनमा रोक लगाइएको छ ।
काठमाडौंको गोंगबुबाट आज थानकोट-नागढुंगा हुँदै बाहिरिने रात्रि बस आज छुटेका छैनन् । पहिरोका कारण रोकिएका र बीचमा रहेका सवारीको हकमा भने समन्वय भैरहेको थानकोट प्रहरीले जनाएको छ ।
यसैबीच चितवनस्थित जिल्ला सुरक्षा समितिले आज राति नारायणगढ- मुग्लिन खण्डमा सवारी चलाउन रोक लगाएको छ । लगातार पानी परिरहेकोले पहिरोको उच्च जोखिम हुने भन्दै क्षति हुनबाट रोक्न राति सवारी सञ्चालनमा रोक लगाएइको हो । आज साँझ ५ बजेदेखि भोलि बिहान ५ बजेसम्म उक्त खण्डमा गाडी चल्ने छैनन् ।
मनसुनी वर्षाका कारण सात वटै प्रदेश जोखिममा रहने भन्दै गृह मन्त्रालयले आज र भोलि हिमाली र पहाडी जिल्लामा रात्रि बस नचलाउन आग्रह गरेको छ । मन्त्रालयले अत्यावश्यक काम परेमा बाहेक यात्रा नगर्न पनि सर्वसाधारणलाई सुझाव दिएको छ ।