हुम्ला । हिमाली जिल्ला हुम्लामा हिमपात भएको छ । गएरातिदेखि मौसममा बदली भई भारी हिमपात भएको हो । यो यस वर्षको दोस्रो हिमपात हो ।
हुम्लामा यस वर्ष गत मंसिर १८ गते पहिलो हिमपात भएको थियो । गत वर्ष भने माघमा मात्र हिमपात भएको थियो । हिमपात भएसँगै हुम्लामा अत्यधिक चिसो बढेपछि जनजीवन प्रभावित भएको छ ।
हिमपातले हुम्लाको एक मात्र हवाई सेवा पनि अवरुद्ध भएको छ । हुम्लाको माथिल्लो क्षेत्र नाम्खा गाउँपालिकाको लिमी, यारी, चाला क्षेत्रमा भारी हिमपात भएको हो ।
लामो समयदेखि हिउँदे झरी र हिउँ नपर्दा निराश बनेका किसान हिउँ पर्न थालेपछि खुसी भएको नाम्खा गाउँपालिका १ का धिंगाका कटक लामाले बताए । हिउँदे वर्षा र हिमपातले पशुपालनलाई असर गरे पनि बालीनालीको उत्पादनमा सहयोग पुग्छ ।
लिमी, मुचु, खगालगाउँ, तिल, जाङ गाउँलगायत स्थानमा बढी हिमपात भएको छ। बाक्लो हिउँका कारण उत्तरी हुम्लाको जनजीवन कष्टकर बनेको जिल्ला प्रहरी कार्यालय हुम्लाले जनाएको छ ।
