काठमाडौं । जाजरकोटको रामीडाँडा केन्द्रबिन्दु बनाएर भूकम्प गएयता बारम्बार परकम्प गइरहेको छ ।
राष्ट्रिय भूकम्प मापन तथा अनुसन्धान केन्द्रकाअनुसार उक्त क्षेत्र तथा जाजकोट जिल्लामा आज बिहान ६ बजेसम्म ६ सय ६ पटक परकम्प गएको छ ।
यसअघि हिजो (सोमबार) बिहान ११ बजेर ३७ मिनेट जाँदा बझाङ केन्द्रबिन्दु बनाएर ४ दशमलव ५ म्याग्निच्युडको भूकम्प गएको थियो ।
गत कात्तिक १७ गते राति ११ बजेर ४७ मिनेटमा ६ दशमलव ४ म्याग्निच्युडको भूकम्प गएको थियो । त्यसयता निरन्तर परकम्प जाने क्रम नरोकिएको केन्द्रले जनाएको छ ।
१७ गते गएको भूकम्पले जाजरकोटमा ६७ हजारभन्दा बढी जनसंख्या विस्थापित भएको छ ।
पीडित बढ्दो चिसोमा त्रिपालमुनि रात कटाइरहेका छन् । उक्त भूकम्पले जाजरकोट र रुकुमका ५ सय ३१ वटा विद्यालयमा क्षति पुगेको छ । एक सय ५४ जनाले ज्यान गुमाएका छन् ।
