काठमाडौं । अनुसन्धान, नवप्रवर्तन र आविष्कारको क्षेत्रमा राज्यले ध्यान नदिएको भन्दै महावीर पुन शुक्रबारदेखि माइतीघर मण्डला आन्दोलनरत छन् । महावीरसहित उनले उठाएका मुद्दामा समर्थन गर्ने युवाहरू शुक्रबारको रात माइतीघरकै सडकमा सुते । शनिबार राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्र पनि आन्दोलनलाई समर्थन गर्न त्यही पुगे ।
पार्टीको तर्फबाट समर्थन जनाउन धर्नास्थल पुगेका मिश्रले महावीरले थालेको आन्दोलनको ठूलो प्रतिकात्मक अर्थ रहेको प्रतिक्रिया दिए । उनले भने, ‘विवेक हराएर निदाएका नेताहरूलाई विवेक जगाउन उहाँ रातभर आएर सडकमा सुत्नुभयो । त्यसको धेरै ठूलो प्रतिकात्मक अर्थ छ ।’ मिश्रले महावीर युवाको प्रेरणाको पात्र भएको बताउँदै सरकारले गर्नुपर्ने काम उनले गरिरहेको दाबी गरे ।
कानुन निर्माण र आविष्कार क्षेत्रमा पर्याप्त बजेट छुट्याउनका लागि महावीरले सरकारलाई बजेट आउनुअघि नै दबाब दिन अन्दोलन थालेको भन्दै उपाध्यक्ष मिश्रले आफ्नो पार्टी समर्थनका लागि तयार रहेको बताए । उनले भने, ‘यो एकदमै राम्रो छ । हामी राप्रपाका सबै साथीहरू उहाँलाई समर्थन गर्न तयार छौँ ।’
सम्बन्धित समाचार...
सांसदहरुले काम नगरे ढ्यांग्रो ठोक्दै लखेट्ने महावीर पुनको चेतावनी
