सरकारले डेङ्गी परीक्षणको एकीन मूल्य नतोकेपछि दाङका अस्पतालले मनोमानीरुपमा परीक्षण शुल्क लिने गरेका छन् । ३ सय रुपैयाँमा किट किनेर पाँच सयदेखि १ हजार पाँच सयसम्म परीक्षण शुल्क अस्पतालले उठाउँदै आएका छन् ।
डेङ्गीका बिरामीले अस्पताल खचाखच भरिन थालेपछि यहि मौका छोपेर दाङका अस्पतालहरुले सेवाका नाममा व्यापार गर्न थालेका छन् । जिल्ला स्वास्थ्य कार्यालयका अनुसार डेङ्गी परीक्षण गर्ने 'टेष्ट र्यापिड किट' ३ सय रुपैयाँमा पाइन्छ । तर दाङका अस्पतालहरुले ५ सय देखि १ हजार ५ सय रुपैयाँसम्म परीक्षण शुल्क असुली रहेका छन् ।
सरकारले स्पष्ट रुपमा शुल्क नतोकेको र खरीद नै महङ्गो पर्ने भएका कारण आफूहरुले परीक्षण शुल्क १ हजार ५ सय लिने गरेको अस्पतालको भनाई छ । दाङका राप्ती स्वास्थ्य विज्ञान प्रतिष्ठानमा ८ सय, मितेरी अस्पतालमा १ हजार २ सय, गोर्खा अस्पताल १ हजार ५ सय, बुद्ध इन्टरनेशनल अस्पतालले १ हजार ५ सय डेङगीको परिक्षण शुल्क लिने गरेका छन् । अस्पतालहरुले मनोमानी रुपमा शुल्क लिएको बारेमा गुनासो आए कारवाही गर्ने प्रशासनको भनाई छ ।
साउन महिनामा १६ जनामा मात्र देखा परेको डेङगी भदौ मसान्तमा एक हजारभन्दा बढिमा देखा परेको छ । डेङगीका कारण दाङमा एक महिलाको मृत्यु भैसकेको छ । दिन प्रतिदिन बढिरहेको डेङ्गीको प्रकोपलाई नियन्त्रण गर्नका लागि परिक्षण किटको सहजता र मनोमानीरुपमा असुलीरहेको परिक्षण शुल्कका बारेमा सरोकारवालाहरुले ध्यान दिनु पर्ने देखिन्छ ।
