नेपालमा कोभिड संक्रमितको संख्या मात्र होइन, संक्रमण दर पनि निकै कम भएको छ । कुनै बेला दैनिक १० हजारभन्दा बढी संक्रमित देखिने गरेकोमा अहिले घटेर दैनिक १० जनाको हाराहारीमा संक्रमित पहिचान हुने गरेका छन् । तर संक्रमणको जोखिम अझै सकिएको छैन । किनकी नयाँ भेरियन्ट आउने क्रम अझै रोकिएको छैन । अहिले पुन: केही देशमा नयाँ भेरियन्ट देखिएको छ ।
कोरोना संक्रमण दर न्यून हुँदै गएका बेला बेलायत, थाइल्यान्डलगायतका देशमा नयाँ भेरीयन्ट ओकिम्रोन एक्स.ई देखिरहेको छ । यो भेरियन्टलाई ओमिक्रोनभन्दा १० गुना बढी संक्रामक मानिएको छ । तर यो कति घातक छ भन्ने एकीन भइसकेको छैन । यसबारे वैज्ञानिकहरुले अनुसन्धान गरिरहेका छन् । बेलायतमा अहिलेसम्म ६ सय र भारतको महाराष्ट्र र गुजरातमा पनि एक-एक जनामा ओकिम्रोन एक्स.ई देखिएको छ । तर नेपालमा भने हालसम्म यो भेरियन्टका संक्रमित पहिचान भएका छैनन् ।
नेपालमा पनि नयाँ भेरियन्टको जोखिम कायमै रहेको विज्ञ बताउँछन् । अहिले कोभिड संक्रमण कम भएको अवस्थामा विदेशबाट आउनेको स्वास्थ्य परीक्षणमा खासै ध्यान दिइएको छैन भने नाकाहरुमा समेत स्वास्थ्य मापदण्डको ख्याल गरिँदैन । नयाँ भेरियन्ट फैलिरहेका देशबाट आउनेहरुले भाइरस ल्याउन सक्ने भएकाले सतर्कता अपनाउनुपर्ने विज्ञ बताउँछन् ।
अहिले कोभिड संक्रमण सकियो भनेर जनस्वास्थ्यका मापदण्डको पालना गर्न निकै कम भएको देखिन्छ । तर नयाँ भेरियन्ट देखिने क्रम नरोकिएकाले भोलिका दिनमा थप समस्या नहोला भन्न सकिँदैन ।