काठमाडौं । दित्वा चक्रवातपछि श्रीलंकाभर परेको भारी वर्षा र बाढीका कारण मृत्यु हुनेको संख्या १ सय २३ पुगेको छ ।
विपद् व्यवस्थापन केन्द्रले शनिबारसम्म १ सय ३० जना बेपत्ता रहेको जनाएको छ । केन्द्रका महानिर्देशक सम्पत कोटुवेगोदाले राहत कार्य तीव्र रूपमा अगाडि बढिरहेको र ४३ हजारभन्दा बढीलाई राज्य सञ्चालित राहत केन्द्रमा सारिएको जानकारी दिनुभएको छ । श्रीलंका सरकारले विपद् प्रतिकार्यलाई तीव्र बनाउन आपतकालीन अवस्था घोषणा गरेको छ ।
भारी वर्षा सोमबारदेखि सुरू भएको थियो । बुधबार मुख्य क्षेत्रमा अझ तीव्र वर्षा भएपछि देशभर बाढीको अवस्था झन् गम्भीर बनेको थियो। देशका अधिकांश भागमा वर्षा कम भए पनि उत्तरतर्फका केही क्षेत्रमा अझै पानी परिरहेको छ । भारतले प्रभावितका लागि आवश्यक राहत सामग्री पठाइसकेको छ भने आवश्यक परे थप सहयोगका लागि तयार रहेको अधिकारीहरूले जानकारी दिएका छन् ।
सरकारले उद्धार र राहत कार्यलाई अझ सुदृढ बनाउन सैनिक बल परिचालन गरेको छ, जहाँ हेलिकोप्टर र डुंगा प्रयोग गरी फसेका बासिन्दाहरू उद्धार गरिएको छ । निरन्तरको वर्षा र निरन्तर बिग्रँदो मौसमका कारण जोखिम अझै उच्च रहेको भन्दै अधिकारीहरूले सतर्कता अपनाउन आग्रह गरेका छन् ।
यसैबीच इन्डोनेसियाको सुमात्रा टापुमा मनसुनी वर्षाका कारण आएको बाढी र पहिरोमा परी ज्यान गुमाउनेको संख्या १ सय ६४ पुगेको छ भने ७९ जना बेपत्ता भएका छन् ।
