काठमाडौं । नेपाल प्रिमियर लिग-एनपीएलमा लुम्बिनी लायन्सले दोस्रो जित हात पारेको छ ।
शनिबार सम्पन्न पहिलो खेलमा लुम्बिनीले पोखरा एभेन्जर्सलाई ३ विकेटले पराजित गरेको हो । कीर्तिपुरस्थित टीयू क्रिकेट स्टेडियममा लुम्बिनीले टस जितेर फिल्डिङ रोजेपछि सुरूवातमा ब्याटिङ गरेको पोखराले निर्धारित २० ओभरमा ५ विकेट गुमाएर १ सय ५० रन बनाएको थियो ।
शेर मल्लले इनिङ्सको तेस्रो तथा व्यक्तिगत पहिलो ओभरमा लगातार दुई विकेट लिएपछि लुम्बिनी खेलमा हाबी भएको थियो । दिनेश खरेल ७ रनमा आउट भए भने कप्तान कुशल भुर्तेलले लगातार दोस्रो खेलमा रनको खाता खोल्न सकेनन् । ओपनर रोसिङ्गटनले ६३ बलमा ७ चौका र ५ छक्कासहित सर्वाधिक ८१ रन बनाए ।
जिमी निसमले उत्कृष्ट ब्याटिङ गर्दै ३२ बलमा ३ छक्का र ३ चौका प्रहार गर्दै नटआउट ५१ रनको अर्धशतकीय योगदान दिए । यो जोडीबीच पाँचौ विकेटका लागि ९२ रनको साझेदारी भएको थियो । लुम्बिनीका लागि शेर मल्ल र तिलक भण्डारीले दुई-दुई तथा गुलबादिन नाइबले एक विकेट लिए ।
जवाफमा १ सय ५१ रनको लक्ष्य लुम्बिनीले १९ ओभर ४ बलमा ७ विकेट गुमाएर पूरा गर्यो । ३३ रन जोड्दा ४ विकेट गुमाइसकेको लुम्बिनीलाई खेलमा फर्काउन कप्तान रोहित पौडेल र निरोशन डिकवालाले ३६ बलमा ५४ रनको साझेदारी गरे । रोहितले ४० रन बनाए ।
यसै खेलबाट एनपीएलमा डेब्यू गरेका श्रीलंकन ब्याटर डिकवालाले ३७ रन योगदान दिए । सन्दीप जोराले अविजित २५ रन बनाए । जितका लागि ४ बलमा ४ रन चाहिएको अवस्थामा सन्दीपले चौका प्रहार गरेका हुन् । पोखराका लागि विपिन खत्री, म्याट टेलर र सागर ढकालले समान दुई-दुई विकेट लिए ।
यो जितपछि लुम्बिनीले लगातार तीन हारको शृङ्खला अन्त्य गरेको छ भने आफूलाई प्लेअफ रेसमा जिवित राखेको छ । पाँच खेलबाट ४ अंक जोडेको लुम्बिनी अंकतालिकामा पाँचौं स्थानमा उक्लेको छ । ४ खेलमा १ जितसहित २ अंक जोडेको पोखरा पुछारबाट दोस्रो स्थानमा छ ।
