काठमाडौं । वैदेशिक रोजगारीमा गएका श्रमिकको स्वास्थ्यसम्बन्धी समस्या समाधानका लागि सरकारले भोलिदेखि टेलिमेडिसिन सेवा सञ्चालन गर्ने भएको छ ।
वैदेशिक रोजगार बोर्डको सचिवालयले वीर अस्पतालसँगको साझेदारीमा टेलिमेडिसिन सेवा सञ्चालन गर्न लागेको हो । यसअन्तर्गत हरेक आइतबार र शुक्रबार विशेषज्ञ सेवा उपलब्ध गराइने बोर्डका प्रवक्ता एवं सूचना अधिकारी राजन पौडेलको भनाइ छ ।
वैदेशिक रोजगार विज्ञहरुले यो सेवालाई हरेक श्रमिकको पहुँचमा पुर्याउन सुझाव दिएका छन् ।
वैदेशिक रोजगार बोर्डको सचिवालयका अनुसार पछिल्लो ८ महिनामा १७० नेपाली नागरिक बिरामी तथा अंगभंग भएका छन् भने ८२० जनाको मृत्यु भएको छ । सबैभन्दा धेरै साउदी अरबमा २३७ जनाको मृत्यु भएको छ ।
