काठमाडौं । आज विश्व मिर्गौला दिवस । नेपालमा वर्षेनि करिब तीन हजारको मिर्गौला बिग्रने गरे पनि सेवा सहज नहुँदा करिब तीन सयको मात्र प्रत्यारोपण हुने गरेको छ ।
नेपालमा मिर्गौला प्रत्यारोपण सुरु भएको १४ वर्ष बितिसक्दा जम्मा २२ सय हाराहारीको मात्र प्रत्यारोपण भएको छ । अहिले पनि करिब ७ हजार ४ सय जनाले नियमित डायलिसिस गराइरहेका छन् ।
सेवा सहज नहुँदा प्रत्यारोपण मात्र नभएर मिर्गौलाको डायलिसिस गराउनसमेत बिरामीले सास्ती खेप्नुपरिरहेको छ । जनशक्ति तथा पूर्वाधारलगायतको समस्याले सोचेअनुरुपको सेवा दिन मुस्किल भएको चिकित्सक बताउँछन् ।
मधुमेह, उच्च रक्तचाप, मिर्गौलाको पत्थरीलगायत कारणले मिर्गौलामा समस्या आउने गरेको छ ।
