काठमाडौं । प्राविधिक तथा व्यावसायिक शिक्षा परिषद्- सीटीइभिटीले १२ वर्षअघि निवेदन दिएका संस्थाहरूको सम्बन्धन प्रक्रिया अगाडि बढाएको छ ।
शिक्षामन्त्री महावीर पुनको निर्देशनपछि सीटीइभिटीले मापदण्ड पुगेका स्वास्थ्य, इन्जिनियरिङ, कृषिलगायत विषय अध्यापन गराउने संस्थाहरूको सम्बन्धन प्रक्रिया अगाडि बढाएको हो । सीटीइभिटीअन्तर्गतका स्वास्थ्य र इन्जिनियरिङका शैक्षिक कार्यक्रमको सम्बन्धनका लागि निवेदन दिने संस्थाहरूको संख्या ४ सय ५० छ ।
उनीहरू २०६९ सालदेखि नै सम्बन्धनको पर्खाइमा छन् । जसअन्तर्गत एक सय शैय्या अस्पतालको पूर्वाधार रहेका ४५ वटा नर्सिङ संस्था छन् भने एचए, ल्याब टेक्निसियन, डेन्टल, रेडियोग्राफी फिजियोथेरापीलगायत ६ सय ५६ वटा, र इन्जिनियरिङ्गका ४ सय ५१ र कृषिलगायतका १ सय ५० वटा शैक्षिक कार्यक्रम रहेका छन् । आवश्यक सबै प्रक्रिया र मापदण्ड पुरा भएकालाई सम्बन्धन दिन प्रक्रिया अगाडि बढाइएको सीटीइभिटीले जनाएको छ ।
शिक्षामन्त्री फेरिएपिच्छे नयाँ सम्बन्धनका लागि शिक्षा मन्त्रालयले कार्यदल गठन गर्ने, तर प्रतिवेदन कार्यान्वयन नगर्ने प्रवृत्ति छ । अहिले पनि सीटीइभिटीको बोर्ड बैठकद्वारा गठित पूर्वशिक्षासचिव किशोर थापा संयोजकत्वको कार्यदलले सम्बन्धनका निवेदनमाथि छानबिन गरिरहेको छ । कार्यदलको सिफारिसका आधारमा आगामी शैक्षिक सत्रदेखि नै विद्यार्थी भर्ना लिने गरि सम्बन्धन दिने तयारी छ ।
सिटीइभिटीकाअनुसार डिप्लोमा तहमा २ सय ८९ वटा स्वास्थ्य, इन्जिनियरिङ्गमा २ सय ७०, कृषिमा १ सय ५० र वन र पर्यटनमा ४५ वटा संस्था सञ्चालनमा छन् । ४१ वटा शैक्षिक कार्यक्रमहरूमा ५३ हजार ७ सय विद्यार्थी भर्ना क्षमता रहेकोमा गतवर्ष २५ हजारमा भर्ना भएका थिए ।
नर्सिङ विषयमा भने कोटा अनुसार पुरै भर्ना भएको पाइएको छ । यो तथ्यांकले पनि अहिले सिटीइभिटीका शैक्षिक कार्यक्रमप्रति विद्यार्थीको आकर्षण घट्दै गएको छ । विद्यार्थी संख्या घट्दै गइरहेको अवस्थामा सिटीइभिटीले तत्कालीन शिक्षामन्त्रीको दबाबमा गत असारमा २५ वटा संस्थालाई स्वास्थ्यका विभिन्न कार्यक्रम सञ्चालनका लागि पनि सम्बन्धन दिएको थियो । यो अवस्थामा नयाँ सम्बन्धन पाएका संस्थाले विद्यार्थी पाउलान् त भन्ने प्रस्न उब्जिएको छ ।
