काठमाडौं । त्रिभुवन विश्वविद्यालयले स्नातक तहमा भर्ना अवधि सकिएपछि कुनै पनि विद्यार्थी भर्ना नलिन डीन कार्यालय र क्याम्पसहरुलाई निर्देशन दिएको छ ।
विश्वविद्यालयका शिक्षाध्यक्ष खड्ग केसीले विज्ञप्ति जारी गरी स्नातक तहको पठनपाठन सुरु भइसकेको अवस्थामा भर्ना नलिन निर्देशन दिनुभएको हो ।
विश्वविद्यालयले विद्यार्थी भर्नासम्बन्धी शैक्षिक क्यालेण्डर र भर्ना सम्बन्धी सूचनाको मितिभन्दा बाहिर गएर भर्ना लिए विद्यार्थी परीक्षामा संलग्न हुन नपाउने चेतावनी दिएको छ । यसको जिम्मेवारी सम्बन्धित डीन र क्याम्पस प्रमुख हुने समेत त्रिविले उल्लेख गरेको छ ।
कान्तिपुर टेलिभिजनले शैक्षिक क्यालेण्डरले तोकेको मितिपछि पनि स्नातक तहमा भर्ना लिइरहेको समाचार प्रसारण गरेपछि विश्वविद्यालयले यस्तो निर्देशन दिएको हो ।
