जनकपुर । मधेश प्रदेशमा पहिलोपटक करिब साढे १० करोड भन्दा बढीको लागतमा तीनवटा आकाशे पुलको निर्माण कार्य सुरू भएको छ ।
सडक डिभिजन कार्यालय मुजेलियाले जनकपुर-ढल्केबर ६ लेन व्यापारिक राजमार्गअन्तर्गत छुट्टा-छुट्टै तीन स्थानमा आकाशे पुलको निर्माण कार्य सुरू गरेको हो । पैदल यात्रुहरूको सुविधाका लागि मधेश प्रदेशको राजधानी जनकपुरधाममा उत्तर तर्फबाट प्रवेश गर्ने सो सडकमा निर्माणाधीन आकाशे पुलको काम पुरा भएमा सवारी दुर्घटनामा कमी आउने सडक डिभिजन कार्यालयले जनाएको छ ।
अत्याधिक पैदल यात्रीको चाँप रहेको सो राजमार्गअन्तर्गत धनुषाको लक्ष्मीनिया गाउँपालिकाको लक्ष्मीनिया बजारमा ३ करोड ४२ लाख, क्षिरेश्वरनाथ नगरपालिकाको महिला विकास चोकमा ३ करोड ३५ लाख र सखुवा चोकमा ३ करोड ४५ लाखको लागतममा छुट्टा-छुट्टै तीन वटा आकाशे पुलको निर्माण कार्य हुन लागेको हो ।
चालु आर्थिक वर्षको असार मसान्त भित्रनै निर्माण कार्य पूरा गर्ने सर्तसहित निर्माणाधीन तीन वटै आकाशे पुलको उचाइ ५ दशमलव ६ मिटर, लम्बाइ २९ दशमलव ४ मिटर र चौडाइ ३ मिटर रहेको कार्यालयले जनाएको छ। आकाशे पुलको प्रयोग गरेर सडकबाट वारपार गर्न सजिलो हुने र यसले दुर्घटनामा कमी आउने सडक डिभिजन कार्यालयको विश्वास छ ।
आकाशे पुल निर्माणाधीन स्थानमा चोकचोराहा, हाट बजार, विद्यालयलगायतका सार्वजनिक स्थान रहेको हुनाले जथाभावी सडक पार गर्दा दुर्घटनामा परी मानिसको ज्यान जाने गरेको समेत घटना दोहरिँदै आएको छ ।
.png&w=400&height=300)
