काठमाडौं । नयाँ बानेश्वरस्थित संसद भवनको पूर्वपट्टि पुरानो ट्रली बसको कार्यालयमा यतिबेला यातायात व्यवस्था कार्यालय बसेको छ । कार्यालयको पर्खाल यतिबेला स्ट्रीट आर्ट, अर्थात् सडक कलाले रंगीचंगी र आकर्षक बनेको छ ।
नेपाली र विदेशी चित्रकारहरूले मिलेर सामाजिक समावेशीकरण र समानता देखाउन पर्खालमा आकर्षक चित्र कोरेका छन् । यहाँ कलाकारले थाङ्कादेखि मिथिला चित्रकलासम्मका कला पस्केका छन् ।
सर्लाहीकी मनीषा साह, भक्तपुरका सुदीप बल, सिन्धुलीका खेमबहादुर पाल्पाली, ललितपुरका किरण महर्जन र अमेरिकी चित्रकार म्यान वनले यातायात व्यवस्था विभागका पर्खालमा तीन दिनदेखि चित्र कोर्दै छन् ।
स्ट्रीट आर्ट प्रोजेक्ट २०२२ अन्तर्गत सडक छेउका पर्खालमा चित्रकला गरिएको हो । यो प्रोजेक्ट अमेरिकी दूतावासको सहयोगमा सञ्चालित छ ।
पाँचजना कलाकारले आ–आफ्नै संस्कृति झल्काउने गरी चित्र कोरेका छन् । मनिषाले फरक–फरक रंग भएकी चार महिलालाई भित्तामा कोरेकी छन् । चारैजनाको छालाको रंग भने फरक फरक छ ।
रंग फरक हुँदैमा मानिस–मानिसबीच विभेद गर्नुहुन्न भन्ने आफ्नो थिम रहेको मनिषाले बताइन् ।
एउटै भित्तामा थाङ्कादेखि मिथिला चित्रकलालाई समेट्न पाउँदा गर्व लागेको उनले कान्तिपुरलाई बताइन् ।
स्ट्रीट आर्टका क्युरेटर कैलाश श्रेष्ठले सामाजिक समावेशिताको विषय पब्लिक डिस्कोर्सका विषयसमेत भएकाले यसमा काम थालेको बताए । उनले भित्तेकला विविधतामा एकता देखाउने प्रयत्न भएको प्रष्ट्याए।
तस्बिरहरू : छिरिङ लामा
यी सामग्रीहरू पनि पढ्नुहोस् !
