काठमाडौं । स्पेनको उच्च अदालतका एक अभियोजकले खेलाडी जेन्नी हर्मोसोको ओठमा उनको सहमतिबिना अवान्छित चुम्बन गरेका फुटबल महासंघका पूर्व प्रमुख लुइस रुबियालेसलाई साढे २ वर्ष कैद सजाय माग गरेका छन् ।
अभियोजक मार्टा डुरान्टेजले रुबियालेसविरुद्ध यौन दुर्व्यवहार र जबरजस्तीको आरोप लगाउँदै साढे २ वर्ष कैद सजाय माग गरेका हुन् । गत वर्षको अगस्ट २० मा सिड्नीमा भएको महिला विश्वकपमा स्पेन च्याम्पियन बन्दा अवार्ड समारोहमा ४६ वर्षीय रुबियालेसले हर्मोसोको ओठमा चुम्बन गरेका थिए ।
अभियोजकले महिला राष्ट्रिय टोलीका पूर्वप्रशिक्षक जर्ज बिल्डा, टोलीका वर्तमान खेल निर्देशक अल्बर्ट लुक र फेडरेसनका मार्केटिङ प्रमुख रुबेन रिभेराले हर्मोसोलाई चुम्बन सहमतिमा भएको स्वीकार गर्न दबाब दिएको आरोपसमेत लगाएका छन् । तर, अदालतमा हाजिर हुँदा तीनै जनाले गल्ती अस्वीकार गरेका छन् । डुरान्टेजले हर्मोसोलाई ५ लाख युरो क्षतिपूर्ति तिर्नुपर्ने माग गरेका छन् ।