मुख्यमन्त्री नियुक्ति बदरको माग गर्दै केदार कार्कीद्वारा सर्वोच्चमा रिट

काठमाडौं । कोशी प्रदेशका निवर्तमान मुख्यमन्त्री केदार कार्कीले नयाँ मुख्यमन्त्रीको नियुक्ति बदर गर्दै आफैंलाई निरन्तरता दिन मागसहित सर्वोच्च अदालतमा रिट दायर गर्नुभएको छ ।

कोशीका प्रदेश प्रमुख परशुराम खापुङले एमालेका हिक्मतकुमार कार्कीलाई मुख्यमन्त्री नियुक्त गरेपछि निवर्तमान मुख्यमन्त्री कार्कीले सर्वोच्चमा रिट दायर गर्नुभएको हो । प्रदेश प्रमुखले संविधानको धारा १६८ को उपाधारा ५ अनुसार नयाँ मुख्यमन्त्री नियुक्त गरेको भने पनि उक्त व्यवस्थाअनुसार मुख्यमन्त्री नियुक्ति गर्न नमिल्ने कार्कीको दाबी छ ।

आफू संविधानको धारा १६८ को उपाधारा ५ अनुसार मुख्यमन्त्रीको जिम्मेवारीमा रहेकै अवस्थामा सोही धाराअन्तर्गत प्रदेश प्रमुखले सरकार गठनका लागि आह्वान गर्नु संविधानविपरीत रहेको भन्दै प्रदेश प्रमुखको आह्वान नै बदर गर्न पनि कार्कीले माग गर्नुभएको छ ।

रिटमा एउटै धाराअन्तर्गत दुईपटक मुख्यमन्त्री नियुक्त गर्नु गैरसंवैधानिक भन्दै अन्तरिम आदेशले कार्कीलाई मुख्यमन्त्रीको जिम्मेवारीमा काम कारबाही गर्न रोक लगाउन माग गरिएको छ ।

एमाले र माओवादी केन्द्रका ५२ सांसदको समर्थनमा एमालेका हिक्मतकुमार कार्कीलाई प्रदेश प्रमुख खापुङले आज बिहान मुख्यमन्त्री नियुक्त गर्नुभएको थियो ।

९३ सदस्यीय प्रदेशसभामा बहुमतका लागि ४७ मत आवश्यक हुन्छ । कार्की यसअघि दुईपटक कोशीको मुख्यमन्त्री भइसक्नुभएको छ । रिटको पेसी भोलि (शुक्रबार) लाई तोकिएको छ ।

यो पनि...

मुख्यमन्त्री हिक्मतबहादुर कार्कीले लिनुभयो पद तथा गोपनीयताको शपथ