विराटनगर । कोशी प्रदेशका नवनियुक्त मुख्यमन्त्री हिक्मतकुमार कार्कीले पद तथा गोपनीयताको शपथ लिनुभएको छ । संविधानको धारा १६८ को उपधारा ५ बमोजिम मुख्यमन्त्री नियुक्त हुनुभएका कार्कीले बिहीबारै प्रदेश प्रमुख परशुराम खापुङसमक्ष पद तथा गोपनीयताको शपथ लिनुभएको हो ।
नेकपा एमालेको तर्फबाट मुख्यमन्त्री बन्नुभएका कार्कीले बिहीबारै सानो आकारको मन्त्रिपरिषद् गठनसमेत गर्नुभएको छ । कोशी प्रदेश सभामा एमालेका उपनेता रामबहादुर राना र माओवादी केन्द्रका गणेश उप्रेतीलाई उहाँले विनाविभागीयमन्त्री नियुक्त गर्नुभएको छ ।
प्रदेश प्रमुख खापुङले बुधबार दुई दिनको समय दिएर सरकार गठन गर्न आह्वान गर्नुभएको थियो । एमाले संसदीय दलका नेता कार्कीले आफ्नो पार्टी र माओवादी केन्द्रका ५२ जनाको हस्ताक्षरसहित मुख्यमन्त्रीमा दाबी पेस गर्नुभएको थियो । ९३ सदस्यीय प्रदेशसभामा बहुमतका लागि ४७ मत चाहिन्छ ।
प्रदेश सांसदहरूलाई प्रदेश प्रमुख कार्यालय बोलाएर सनाखत गरिएको थियो । कार्की झापा निर्वाचन क्षेत्र नम्बर ५ (क) बाट प्रदेशसभा सदस्यमा निर्वाचित हुनुभएको हो । कार्की यसअघि दुईपटक कोशीको मुख्यमन्त्री भइसक्नुभएको छ । २०७९ पुस २९ गते पहिलोपटक मुख्यमन्त्री बन्नुभएका कार्कीले सत्ता समीकरण फेरिएपछि २०८० असार १४ मा राजीनामा दिनुभएको थियो ।
सर्वोच्च अदालतको परमादेशपछि २०८० भदौ २२ मा ठूलो दलको नेताको हैसियतमा मुख्यमन्त्री बन्नुभएका कार्कीले असोज २० मा राजीनामा दिनुभएको थियो । केन्द्रमा पुनः एमाले र माओवादी केन्द्रको गठबन्धन बनेपछि कार्की तेस्रोपटक मुख्यमन्त्री बन्नुभएको हो । गत असोज २७ मा केदार कार्की पनि धारा १६८ को उपधारा ५ अनुसारै कोशीको मुख्यमन्त्री नियुक्त हुनुभएको थियो ।
यसैबीच निवर्तमान मुख्यमन्त्री केदार कार्कीले हिक्मत कार्कीलाई मुख्यमन्त्रीका रूपमा कुनै काम गर्न नदिन अन्तरिम आदेशको मागसहित सर्वोच्च अदालतमा रिट दायर गर्नुभएको छ । कार्कीले दायर गरेको रिटमा प्रदेश प्रमुखले असंवैधानिक रूपमा सरकार गठन आह्वान गरेको भन्दै आफैंलाई यथावत् काम गर्न परमादेशको माग गरिएको छ ।
यो पनि...
मुख्यमन्त्री नियुक्ति बदरको माग गर्दै केदार कार्कीद्वारा सर्वोच्चमा रिट